Beste minse, daarpsgenoote,
Goeie Lunteraone hen wat mit ons daarp. Op verscheije meniere zette veul daarsgenoote zich in veur de Lunterse gemeenschap.
Da’s zeeker ok zoo wat betreft de uutstraoling van ’t daarp deur ‘t behouwe van ’t ouwe. Zoo sting d’r ofgeloope meert een beschouwinkje van Martijn Stöfsel in de Lunterse Kraant, oover oranje veurrangspaoltjes an de Klomperweg. ’t Zou mooi weeze as die bewaord blieve.
De Kemissie Oud Lunterse Dag het deur de jaore heen ok zulk soort zaoke angepakt. Veul vrijwillegers hen d’r eige daorveur ’t vuur uut de sloffe geloope en ’t wier vaok ok nog op z’n Lunters betaold.
As ’t eenmaol klaor is, dan mo’je d’r wel naor um blieve kieke en zorge dat ’t nie verslort. Mer umdat de Kemmissie nie altied goed op de hoogte is van wat d’r in ’t verleeje al is gedaon, loopt dat een bietje uut de haand.
Noe zin d’r planne um een Stichting “Onderhoud daarpsveurzieninge” in ’t leeve te roepe. Die Stichting mot d’r veur zorge dat de boel op z’n Lunters angepakt blieft worde. De Stichting mot op eige beene staon en z’n eige kunne bedruupe.
Mer zooveer is ’t allemaol nog nie. Daorum het de Kemissie Oud Lunterse Dag besloote um d’r vast een dreij in de goeie richting an te geeve, mit ‘t thema van de 44ste Oud Lunterse Dag:
“A’je ’t ouwe nie eert, bin je ’t neije nie weerd”
En een goed verstaonder het een half woord noodeg!
De saomestelling van de Kemissie is van ’t jaor veraanderd. Nao acht jaor het Adrie Schoffel ofscheid genoome en daor is Gaart Puup veur in de plaots gekomme.
We noeme effe de naome bij de footoo van links naor rechts:
Gijs van de Duurvekamp, Meeuwis van de Stroet, De Hoefsmid, Gaart Puup, Jeroen de Vliegert, Bart uut ’t Pompedaarp, Job van Jacob, De Buurtrichter, Sjakie van de Ukkehut, Dries van de Waoterloop en Evert de Braojert. Hoog op de leer staot Wous Rietsnijer en halverweege d’r naost staot Nico Stopvaarf.
De Kemissie Oud Lunterse Dag
Lees hier de online krant van deze week.
