Eeregaste bij de 44ste Oud Lunterse Dag
Elk jaor weer noodegt de kemissie een koppeltje minse uut um op de zaoterdag van de Oud Lunterse Dag as Eeregast anweezeg te zin. D’r zin altied vaste genoodegde, zooas: de Burgemeester, de Heidehoogheeje, de Lookoo, de Nootaores en nie te vergeete de Booveste Beste Burger. Mer ok gewoone Lunteraone kunne worde uutgekooze as Eeregast. Je mot dan iets te maoke hen mit ’t thema of je heel iezeg veul hen ingezet veur ons daarp.
A’je iezeg je best doe um ’t huus, ’t aarf of de straot feestelek op te tuuge, dan ku’je een plaots as eeregast verdiene veur ’t ankommend jaor. Veur de toekomst slaon we zoo twee vliege in één klap: we hen Eeregaste én een machteg mooi versierd daarp. Um en naobij de Oud Lunterse Dag gaon de kemissieleeje op de fielecepee ’t heele halve daarp deur, um te kieke wie d’r mit de eer gaon strieke. Hoe meer minse d’r meedoen, hoe mooier ons daarp wordt.
Wat stelt zoo’n dag as Eeregast noe eigelek veur?
Um te beginne mo’je iezeg vrog je nest uut, um op tied bij De Lunterse Boer te weeze. Je krieg daor een bak koffie mit koek en d’r worde ok nog offiesjeele footoo’s van je gemaokt. Dan gaon we mit de “Kleine Optocht” op ‘t daarp an.
Vanuut de meziektent bin je getuuge van ’t losgooije van de Oud Lunterse Dag.
As dat klaor is, gaon we mit z’n alle loopes deur ’t daarp en eete we aarges een paor sneeje brood. Ansluutend rije we mee in de Reutemeteut en daorna bekieke we de rest van de optocht en ’t ringsteeke. As alle aktiviteite in ’t daarp ofgeloope zin, dan gaon we an de schranstaofel, waor een plaotsje veur ons is vrijgehouwe. Je hoef naarges oover in te zitte, went de Kemissie zorgt de heele dag veur je natje en je dreugje.
Eeregaste uut ‘t daarp
Deurdat we de leste 2 jaor gien ouwerwetse Oud Lunterse Dag hen kunne houwe, gaon we op de 44e Oud Lunterse Dag de uutgekooze huushouwes van 2019 meeneeme as eeregaste:
– Jan en Martine van Donkelaar
– Jan en Gerda Leppers
– André en Wendy Wien
In de Coronatied hen we ok een groote Oud Lunterse Dag verlooting gehouwe. Eén van de prijze was da’je as eeregast meekon mit de volgende Oud Lunterse Dag. Deeze huuwhouwes han geluk:
– Evert en Marian Goor
– Marieke Buijnink
Lees hier de online krant van deze week.
