Beste daarpsgenoote,

Hen jullie ok al gemaarkt dat de rondweg um Luntere, ja de Westzoom al zo mooi is opgeknapt? Sommige minse hen dr een speciaole herinnering an want veur dat die ope ging reee ze dr al overheen. En dat leeverde ze een fikse boete op.

Ik denk dat die weg dur een jaor of zeuve leit en veurdat die dur kwam was dur een informaotieaovund bie Floor. Ik weet nog dat dur toe iemand was die zei dat die weg te smal was veur vrachtwaoges, mar dat was an doovemansoore gezeid.

Waant die hooge heere die dur verstaand van hen vonde dat tie breed zat was. Mar nao al die jaore bin ze dur achter gekomme dat tie tog breeder mot. Noe is dat dan gebeurd en dur bin zelfs ok nog streepe midden op de weg gekomme, (al is dat nog nie helemaol klaor mar dat komt deur de reege ) Veural as ut mistig is, is dat een heele verbetering.

Zo zie je mar weer as je mar geduld het dat ze dan in Ee ut ok beginne te snappe! Noe mar dur an denke um nie te hard te rije op zo n mooie gladde weg, want je het zoo weer een prent, en dat is jammer, want veur dat geld kun je beter een keer gaon eete.

 

Minse Gegroet, De aandere Job.