Nou, nou de drieëndartegste Oud Lunterse Dag zit’er jammergenog alweer op. En wát veur één. Weeke en maonde hen we naor deeze dag uutgekeeke en zin we d’er mee beezig geweest en noe is ‘t alweer veurbij. ‘t Was een biezonder geslaogde dag.

Ok umdat ‘t weer best meeviel! Vrijdagmaarge had ik ‘er nog een zwaor heufd in. Want die keel op de radio veurspelde niet veul goeds. Ik docht as die keel ‘t es goed zal hen, wat zal de’r dan van terechtkomme? Mer ‘t is gelukkeg best meegevalle. Vrijdagsaoves was ‘t bij ‘t volkstoneel ok iezeg druk en gezelleg. ‘t Was een iezeg mooi stuk mit leuke liedjes. Veural dat liedje: “As je ‘t mer in Luntere doet, dan is het goed!” Dat ist’er één um te onthouwe! Ok de veiling is goed verloope en ‘t het weer een leuk centje, teegeswoordegs zeg je eurootje, opgebrocht veur volgend jaor.Willem van de Pompe het ze’n stem niet gespaord en dan ok niet zonder resultaot. Henk Houtluus mos naor veure komme um veur de leste keer nog 1 keer wat umhoog te houwe um te veile. Ze hen um iezeg bedankt veur ze’n jaorelange inzet bij ‘t groot Aarfhuus. As Willem van de Pompe dat net zooveul jaore vol zou houwe as Henk, hoe oud zou dié dan weeze ....? Zaoterdagsmaarges het Casper Hangiezer, Hendrikje en mien thuus opgehaold mit die machteg mooie Jaguar. As ik goed onthouwe het ist’ie van 1966. ‘t Is dus een heele ouwe mer ‘t leek wel een neije, oft’ie zoo uut de winkel kwam. Alleen ‘t stuur zat an de verkeerde kaant mer dat schient zoo te heure in Engeland, zeije ze teege mien. De veurzitter Peet van Willem van Peet was d’er ok bij en zoo zin we saome op de Lunterse Boer angegaon. Denk t’er um dat we mooi wies zaote te kieke, in zoo’n mooie waoge. Het ritje was veur mooi eigeluk net kort zat naor de Lunterse Boer. Daor hen we buute gezelleg mit ze’n alle een bakkie koffie gedronke mit een iezeg lekkere koek d’er bij. De deeres van de Lunterse Boer hadde ok allemaol de ouwe kleere an. Hastikke mooi!
Hendrikje en ik hen de eer gehad um bij de burgemeester en ‘t wief in de koets te zitte, mit op de bok Beb en Joop Meijer. Saome op weg naor ‘t Nieuwe Aarf waor ‘t offisjieele gedeelte begon. Ik was t’er beduusd van hoeveul minse d’er al op de been waore. De deeres van Lunthari zaote d’er ok en hadde allemaol de rooie zakdoek meegenoome um naor de burgemeester te zwaaie! En de burgemeester had de zakdoek ok weer bij ‘em en zwaaide zooas gebruukeluk terug. Ja zonder rooie zakdoek zal die niet in Luntere durve komme! Naodat de veurzitter ‘t woord gedaon had, het ik as Lookoo de Bovenste Beste Burger bekend gemaokt. Dat was dit jaor Wout Roelofsen, wat het die keel veul veur Luntere gedaon, en een hoop minse geholpe mit raod en daod. Hij het ‘t dan ok dubbel en dwars verdiend. Netuurluk kwam Jobje de Postbooi ok weer effe langs toen de burgemeester an’t praote was. Jobje was deeze keer goed tevreeje oover um. En zoo kwam ‘t dan ok dat’ie de burgemeester een weekend an ging bieje. Iedereen klappe! Wat bleek noe. De tas ging los en het weekblad weekend werd’ em angebooje. ‘t Was een machteg mooie grap!
De burgemeester zei ok nog dat Lunteren 1 dag per jaor op de Oud Lunterse Dag een vrijstaot mag weeze en dat de Lookoo burgemeester van Lunteren het de heele dag veur ‘t zegge het. Toe zei Jobje dat’ie geliek naor huus mos want dan gao ik vandaog nog een stuk bij m’en huus anbouwe want maarge mag ‘t nie meer. Iedereen lachte! Nao ‘t offisjieele gedeelte het de veurzitter de Oud Lunterse Dag los gedaon. We zin deur ‘t daarp geloope mit ‘t heele stel en hen daor de boeremarkt bekeeke. Ok bij de meul was t’er weer de beste muldersknecht en meid an de gang um te winne. Het was ooveral in t’ daarp gezelleg druk en we hen bar genoote.Vandaor zin we mit de trekker van Kelderman en de waoge van Gijs v.d. Kuul d’er achter, deur Aorie Kelderman netjes ofgezet bij Euterpe um daor een hapje te gaon eete. Haarmen Waotervaarf had de zaol iezeg mooi ingericht. De broodjes en de soep smaokte buutegewoon best. Ze hadde zelfs twee soorte soep, je kon gewoon kieze. Nee Haarmen en de deeres hadde ‘t weer goed veurmekaor. Hendrikje en ik hen iezeg lekker gegeete, de bediening was ok weer zeer goed. Petje of! Daornao hen we ons klaorgemaokt um mit de reutemeteut mee te gaon. Hendrikje en ik hadde ‘t dit jaor zeeker beeter getroffe as veureg jaor, toe ze ons vergeete waore in te deele mit de waoges en we zoowat moste loope. Noe zaote we bij Gert v.d.Vendel uut Bennekom in een prachtege koets. ‘t Dak kon oope en dicht. Eigeluk zaote we boove onze staand. Onderweg kreege we af en toe een bui en dan deeje ze de kap dicht en zaote we lekker dreug. En as ‘t weer dreug was zaote we d’er weer bar wies in te kieke. Een dikke pluim veur familie v.d. Vendel. Op de podiumwaoge in ‘t daarp hen we de reutemeteut zitte kieke. D’er was weer een hoop waark van gemaokt. Iezeg mooie waoges en trekkers mit karre. D’er deeje d’er
wel meer as honderd mee Ik geleuf honderdtwienteg. Ok waore d’er minse en kiendere bij die loopes waore mit wat bij d’er. Sjaon mit ‘t heele huushouwe had de kar ok weer goed vol. Wat me wel is opgevalle is dat’er heel wat jongelui dit jaor gaon trouwe. Zou ‘t ok  komme umdat we noe goedkoopere huuze hen? Ik het ‘t Gaart Jan Kruutmoes wel,een keer of vijf heure zegge.Trouwes Gaart Jan het’er mer weer veul waark an gehad um vanalles an de weet te komme oover de minse en de waogse en dan ok nog alles an mekaor te kletsen, went ‘t mos nog waor weeze ok.  Waor ik ok iezeg blij um bin is dat’er zooveul jongelui plezier hen in ‘t bouwe van een waoge. En we hen ze  allemaol gezien. Prachteg. Jonges en deeres gao zoo deur, dan gaot de Oud Lunterse Dag niet verloore. De reutemeteut kemmissie kan d’er best trots op weeze dat ze weer zoo’n iezeg mooie reutemeteut an ons hen kunne laote zien. Gao zoo deur! ‘s Aoves in de tent was ‘t ok iezeg gezelleg. Hendrikje en ik hen ‘t tenminste goed naor onze zin gehad. Een lekker muusje hutspot gegeete. Evert v.d. Veen had daor ok noe weer goed ze’n best op gedaon. ‘t Smaakte buutegewoon goed.
De bediening in de tent was ok weer zéér goed. Die deeres van de rijvereeniging hen  ‘t vuur uut de sloffe geloope um ieder ‘t zijne te geeve. Ja, an die minse én de padvienders hen we heel veul te danke. Goed gedaon jongelui. En zoo ist’er ok an deeze Oud Lunterse Dag een end gekomme. En kunne we terugkieke op een geslaogd feest. As we gezond blieve zin we volgend jaor weer van de partij.

De Lookoo van Lunteren, Jaap v.d. Heuvel