De neegenentwientegste Oud Lunterse Dag zit de’r jammer genog al weer op. We zin zonder dat we de’r arg in hen al weer op weg naor de dartegste.

Wat was ’t een iezeg geslaogde dag. Veural umdat ’t zulk bar mooi weer was hen we het buutegewoon getroffe.

Hendrikje wou eerst de pluu nog meeneeme went ’t leek d’r op dat’er reege zou komme. Mer ze het ’t toch op ’t lest nie gedaon.

Jan van de Driest het ons ' maarges thuus opgehaold mit de Mercedes en toe ok de Bovenste Beste Burger Henk Herikhuisen en z’n wief Gerda. Denkt’er um dat we daor heel wies in zaote te kieke. De rit naor de Lunterse Boer was eigeluk net an de korte kaant.

Daor vandaon zin we mit de koets, in de kleine optocht, naor ’t Nieuwe Aarf gebrocht waor ’t offiesjieele gedeelte begon. Hendrikje en ik hadde de eer um mit burgemeester Tineke Neetelenbos en de’r keel saome in één koets te zitte. Onderweg praotte ze allebei as brugman. Buutegewoon mooi.

Op ’t Nieuwe Aarf angekomme was ik t’er beduusd van hoeveul minse de’r op de been waore. Nao ’t huldige van de Bovenste Beste Burger Henk Herikhuisen zou ik héél wies de oorkonde veurleeze en hum anbieje mer 't heele ding was vurt. Dan stao je wel effe raor te kieke.

Mer ’t is goedgekomme. Toe we laoter in Euterpe kwaome wast’ie weer boove waoter gekomme en kon Henk hum alsnog in ontvangst neeme.

Ok wier d’er op ’t Nieuwe vanweege 't 100-jaoreg bestaon van ons eigen Kunst Na Arbeid een andenke angebooje deur de Stichting Oud Lunterse Dag. Deur Gerrit van Dijk de veurzitter wier ’t in ontvangst genoome. ’t Was een ovale spiegel mit 't vereenigingsgebouw Eutherpe d’r ingesleepe. Een onuutwisbaore herinnnering an dit groote jubileum!

Mit de reutemeteut zaote Hendrikje en ik in de koets van Bertus Willems mit 2 mooie zwarte peerde d’er veur. Connie Adams assisteerde Bertus, want zoo af en toe stopte we effe en dan spoot Bertus wat veerust oover de peerde, teege de vliege, en dan hield Connie de teugels vast. We hen onze ooge uutgekeeke zooveul minse of t’er ooveral langs de weg stonden te kieken. Wat was ’t weer iezeg druk in ons mooie daarp. Ja ’t was ok dit jaor weer een machteg mooi geheel, prachtege waoges! Speciaol veur ’t jubileum van K.N.A. dit jaor 't thema: “Achter de meziek an”. De deelneemers hen koste nog meuite gespaord. Petje of en meraokels goed veur mekaor, grandioos.

Bij de podiumwaoge stonde Bolle Bart en Evert Jan Klok de eindjes an mekaor te kletse oover de karre en minse in de reutemeteut wat of ’t allemaol veurstelde.

Ok ’t ringrije was goed veur mekaor. Mooie anspanninge. Bolle Bart was d’r hastikke druk mee um ’t één en aander van de koetse en peerde uut te legge, want daor het’ie wel verstaand van!

' Aoves in de tent was ’t ok weer iezeg gezelleg. Lekker muisje gegeete. Een pluum veur de kok! Mooi stuk meziek d’er bij, goeie sfeer, goed veur mekaor.

Laoter daanse, pooloonaise loope, schik maoke, de aovend vloog um.

Al mit al kunne we terug zien op een zéér geslaogde Oud Lunterse Dag 2007.

Ik hoop dat jullie net zoo genoote hen as Hendrikje en ik.

As we gezond magge blieve, zin we volgend jaor zeeker weer van de partij.

De Lookoo van Lunteren.