De Lunterse Kraant viert zn vijf jaoreg bestaon. Das een iezege beste prestaotie went dr bin gien abonnees en toch krieg je alle week de kraant graotes en veur niks in de bus. De een kriegt de Lunterse Kraant al op vrijdag en de aander mot tot zaoterdag wachte veur tie um het.

As de kraantejong zn gat nog nie gekeerd het, laon de meeste Lunteraone alles uut de haande valle en griepe ze geliek naor de kraant. Mer je het dr ok nog bij die niet zo lang kunne wachte en dr gauw eentje in t daarp gaon haole. Dat zin de echte en die pluuze um van veur tot achter heelemaol uut. Zukke lui hen dan ok geliek in de gaote as tr zo af en toe es een klein foutje tussedeur sluupt.

Minse, das noe juust t mooie van onze eige Lunterse Kraant. T mag van mien best een bietje kneutereg blieve en dan mojje ok nie zo krek kieke. Vanof deze plek wil ik alle minse bedaanke die tied, geld en meuite in de Lunterse Kraant steeke en ik hoop dat we de kraant nog heel veul jaore in de bus magge kriege.

As t zo uut komt zal ok ik mien bijdraoge daor an geeve en zo noe en dan es een stukje schrieve.

Minse, tot zoveer

Ep Spek