Overal zie je kunst. t Heurt dr teegewoordeg allemaol bij, althans zo liekt t. En bij kunst hen de meeste minse in ons daarp zo iets van: doe mer gewoon, dan doe je gek genog. Noe kan kunst ok best aordeg weeze. Hoe je t went of keert; ons eige Lunters Vrouwtje is ok kunst. Gien mins die daor nog an komt. Daor blieve ze vanof.

As je t zo bekiekt dan hen we eigeluk nie zo heel veul kunst in ons daarp. Begriep me goed, t is noe ok nie zo dak hier een mooi praotje gao houwe um al die geitewollesokkefiguure nog langer van t waark te houwe. Mer toch, dr zin best een paor steeje waor ze wat mien betreft best s wat aordges neer zouwe kunne zette. Ik denk beveurbeeld an de rotonde bij de Meulunterseweg. As je nog een poosje veerder bin dan zulle dr bij de ontsluutingsweg ok nog wel een stuk of wat rotondes komme. Laote ze daor noe onderhaand s wat mooie kunst neer zette. Je zult zien dat t heel nie misstaot.

In Barreveld bin ze al zoveer. Daor kriege ze vlak bij t nieuwe politieburo, op die rotonde daor, ok kunst. Je raod t al: ze kriege kunstkiepe, en wel kunstkiepe van een paor meter hoog. Noe, ik bin blij dat ze daor en nie hier staon. In Ee hen ze een gresspriet van minstes twaolf meter hoog. Ok deze kunst vien ik gien succes. Mer ja, wie bin ik.

In de Daarpsstraot van ons eige daarp komt as t deur gaot ok wat. Een beekloop. Gien echt waoter, mer deur blauwe keije te gebruuke zou de ouwe beek van vrogger weer deur t daarp loope. Althans, zo mot t lieke. Wat mien betreft hoeft t nie en kunne ze de cente beeter gebruuke. Dr het daor op die plek nooit gien beek geloope dus hoeft die dr noe ok nie te komme. Mer die rotondes, dat zie k nog wel zitte. Alleen, hoe zou je daor noe s wat neer zette? Ik het dr s een poosje over naogedacht en k geleuf dak dr uut bin: Op zn Lunters!

Minse, tot zoveer

Ep Spek