Op zn Lunters

Hen jullie van de week ok onze taandedokter op de tillevisie gezien? Je geleuf t niet, mer hij was op TV-Gelderlaand en niet eene keer, mer verscheije keere was ie te zien. Ze hen daor ieder heel uur een Gelders journaol en op woensdagaovond was Lunteren mit zn eige taandedokter pontefiekaol op de buis. Hij had t dr over dat as ze onze Daarpsstraot noe es eindeluk gaon ofsluute, dat dr dan weer van die ouwerwetse lantaorns motte komme, net as vrogger. Ok liet ie de Lunterse paoltjes en de prullebakke zien en zelf zat meneer, as of t heele halve daarp van hum was, op een van de ouwerwetse baankjes uutgebreid te verkondege hoe ons daarp straks nao de rennevaotie dr uut zou motte komme te zien. Mer je kun zegge wat je wil; hij het t wat mien betreft keureg gezeid! T zag dr al best heel mooi uut op de tilleviese mit al die sneeuw op de achtergrond en t zonnetje dat zo heerluk scheen. Van mien mag tie dr mee deurgaon en ik hoop dat ie ze in Ee zoveer kriegt dat ze dr an mee waarke.

Minse, tot zoveer

Ep Spek