Ruum een maond geleeje sting ’t in verscheije krante te leeze: Op 25 meert 2006 is de eerste landelijke opschoondag die wurdt georganiseerd deur de Stichting Nederland Schoon. Mit deze eerste opschoondag wille ze in ons land ’t zwaarfvuul van de straot of zien te kriege. Da' noe weer ' een mooi initiatief docht ik bij mien eige. Al die troep die d’r soms op straot leit, da' toch gien gezicht dus: mit z’n alle opruume die troep.

Een paor daoge laoter lees ik tot mien groote verbaozing een stukje over een vrouw uut Geldrop. Ze was mit een zakje oud brood naor de vijver geloope um de eendjes te voeren. Toen ze al ’t brood an de eendjes had gegeeve dee ze de leege buul netjes in de afvalbak die bij de vijver sting. Mer wat denk je dat er gebeurd. Een milieu-ambtenaor van de gemeente houdt die beste mevrouw an en geeft heur een fikse bekeuring van wel 75 euro! Die keel van de gemeente had gezeid dat ze die buul mee naor huus had motte neeme. Volges hum was ’t huusvuul. Hei je ’t ooit zo zout gegeete?

Mer veurege week heur ik opnieuw van zo’n verhaol. Noe wat dichter bij huus, naomeluk in Putten. Daor liep een keel de supermart uut en ziet 'ie op de perkeerplaots een pakje botter ligge. Dat heurt daor nie en as ’t deur een auto wurdt platgereeje krieg je een groote vette bende. Hij prakkezeert niks en raopt dat pakje botter op en doet 't in de prullebak. En weer buugt zo’n geitewolle sokkefiguur van de gemeente d’r as een bok op een haoverzak op af en slingert die keel die zich van gien kwaod bewust is op de bon. Weer 75 euro veur de gemeente.

Noe hoop ik nie dat ze in Ee ok de goedwies net zo kapot hen as in Geldrop en Putten, went dan hek net zo lief dat ze dat mooie straotmeubilair dat onderhaand in de Daarpstraot mot komme veur ’t plein bij 't gemeentehuus neerzette. Dan zulle we daor 't zwaarfvuul ' naor toebrenge. Nee minse, ik geleuf dat de raod in Ee wel wiezer is, mer ak ankommende zondag weer naor de eendjes gao neem ik de leege buul wel mee naor huus. Je weet mer nooit.

Minse, tot zoveer…

Ep Spek