Op zn Lunters

Veurege week hen we bevrijdingsdag gevierd. t Heele halve daarp was prachteg versierd (de aandere helft het zeeker gien tied gehad of is mit de daotum in de war) en t Oranjecomitee had iezeg zn best gedaon um dr n leuke dag van te maoke. Anders dan zesteg jaor geleeje was t weer noe nie um over naor huus te schrieve. De heele dag het t n bietje gemiezerd, mer dr was volluk zat op de been. We hen mit zn alle kunne kieke naor n mooie groote optocht mit ouwe leegervoertuuge veurop en de schoolkiendere dr achteran. Veural de school uut t Woud had iezeg zn best gedaon en dee mit twee groote waoges mee an de optocht. Op de eene waoge han ze n vliegtuug van de Engelse naogemaokt en op de andere waoge sting de schaopskooi van de Ginkelse hei, compleet mit schaope dr veur en parasjuutiste op t dak. Ik mot zegge dat ze t in t buutegebied altied goed veur mekaor hen. Gien kapsones of slappe praotjes mer ieder jaor weer de mooiste waoges van de optocht en daor krieg je de minse mee de straot op, daor komme ze veur kieke. s Aoves liep t daarp al weer uut naor Euterpe, waor um tien uur t vuurwaark begon. Dr is wel zwat duuzend man geweest zeije ze, dus dat is ok veur herhaoling vatbaor. Behalve veur die grappemaoker die an de andere kant van straot, midde tusse de minse, zelf ok zo noodeg vuurwaark af mos gaon steeke. Ik het begreepe dat die jong daor al rap spiet van het gekreege. Hij had de pech dat dr net n verkeerde (of mot ik goeie zegge) tusse t pebliek sting, zoodat ie zonder vuurwaark zelf ok ineens sterretjes zag.

Minse, tot zoveer

Ep Spek