Veurege keer schreef ik dat we weer thuus waore van de vakaantie. Dan denk je bij je eige dat je uutgerust bin en t veurloopeg kalm an kan doen. Mer niks is minder waor. Neem noe beveurbeeld de tuin rondom t huus. t Gres ziet dr nie uut en veerder liekt t wel n groote wildernis. De hop greuit tot hoog in de denneboom en t onkruud komt boove de buxushaog uut.

Tied veur een groote beurt dus. As je dan nmaol an de gang bin dan weet je soms van gien ophouwe. Zo hen we een stuk of wat stamroosjes in de veurtuin staon en die waore zo goed as uutgebleuid. Ze waore al iezeg mooi in mei en in augustus hen ze weer volop in de bleui gestaon. Dus ik docht bij mien eige, is zal ze s effie lekker kort knippe.

Toen ik zowat klaor was kwam de buurman om de hoek kieke. Hij zeit: Wat bin jie noe an t doen? Jie bin daor veul te vrog mee. Je kun ze pas over een maond of wat snoeie! Noe bin ik van huusuut knap eigewies zak mer zegge, dus die buurman van mien kon mooi de pot op.

Ik zei teege hum: Noe mot jie s goed naor mien luustere. Veureg jaor hen ze in oktober nog gebleuid dus wil jie mien nog meer vertelle over hoe je rooze mot snoeie?. Dat was nog waor ok en de buurman wist dat ok nog, dus die droop geliek of.

An t eind van de middag ging ik es effie kieke en toen kreeg ik geliek al spiet van mien eigewieze gedoe. De rooze bleuide noe al, mer dan zonder bloeme. t Waoter dreef dr mezoo uut.

Ik bin mer gauw naor binne gegaon veur de buurman naor buute zou komme. Die zal t dr nog wel een keer goed bij mien dr in wrieve. Ik had netuurluk ok beeter motte weete en nie zoo eigewies motte weeze. Mer toegeeve zak nooit. Noe mer ofwachte of dr in oktober nog knoppe in de roos zitte.

Jullie heure t wel.

Minse, tot zoveer

Ep Spek