Wat hen we weer een kwakkelwienter dit jaor. As je t goed bekiekt is t eigeluk de leste jaore niet veul beter geweest. Jaore terug wier dr nog wel es geschaotst op de Lunterse Beek of in ieder geval bij Vlastuun of bij Van Ginkel in t Eereveen, mer de leste jaore is daor weineg meer van terecht gekomme. De meeste kiendere kenne schaotse noe alleeneg nog van de tilleviese. Zelf hen ze t nog nooit gedaon en dat was vrogger wel heel aanders. Vandaog an de dag gaon ze in plaots daorvan dan maor mit t heele spul naor t buutelaand veur de sneeuw. Effe dr heelemaol uut veur een wiekendje Wienterbaarg of as t kan leije een heele week naor Oosterijk of Zwitserland. Veurige week mit de veurjaorsvakantie leek t daarp wel zowat uutgestorve, zo rustig as t was. En de minse maor klaoge. As je t zo bekiekt hen we t mit zn alle nog niet zo slecht. Mer we hoeve t dit jaor in ieder geval van de wienter niet meer te verwachte. Daorum mag t van mien rapachteg veurjaor worde. Ik kan dr noe al naor uutkieke as de boel weer uut de grond komt en de boome weer blad kriege. En messchien kriege we dan volgend jaor weer een echte ouwerwetse wienter.

Minse, tot zoveer

Ep Spek