|
|
|
Op z`n Lunters
|
Jullie magge best wete dat we de leste tied nogal krapachtig in de cente zitte. Wat is noameluk ut geval? Dat zal bij jullie ok wel zo weze neem ik an. Regelmoatig krieg je van die akseptkoarte um mee te betoale. Meestetied is dat veur goeie doele, veur dove minse en slecht, of helemoal nie kunne ziende en veur kiendere die wat mankere enz.enz. Noe is ut onze gewoonte umdat we zelf gezondachtig magge weze overal an te betoale. Meestal un tientje, en dat stoat t`r dan ok op, veurig joar betoalde je un tientje. Dus dit joar ok mer weer un tientje veur al die meroakels goeie doele. Mer dat is ons lilluk opgebroke. Went un tientje is deur dat eurogedoe gien tientje meer, mer zo umtrent tweentwientig gulde. Zodoende zin we meer as ut dubbele kwiet en dat is wel veulachtig vonde we. Noe hen we mit ons eige ofgesproke um die akseptkoarte is krieties te goan bekieke. De was t`r ok n van Minse in Nood, ik doch bij m`n eige, zo zeutjes an zin we zelf minse in nood. En we geve ok altie an ut ongebore kiend, dat is toch wel roar um te betoale veur kiendere die nie ees bestoan. Zo is t`r un hele hoop te bespoare. Mer of dat dan wel de goeie weg is weet ik ok nie. De meeste van ons hen ut heel bar best, en dan mag je toch wel wat over hen veur minse die ut nog beroerder hen as ons soort minse. We hen uutgerekend dat as we de bedroage van de guldes deur de helft doen dat t`r dan nog genog veur ons eige overblieft.
Minse, de groete mer weer,
Job van de Top. |
|
|
|
|
|
|
|
|
