|
|
|
|
Joarwisseling
|
Van verscheije minse het ik geheurd dat de kerstmart dit jaor iezeg gezelleg was en zeeker goed geslaogd. 't Was wel bar koud mit die dunne wiend d'er bij. Mer 't deed'er in 't daarp zeeker niet onder zooas 't bij de koepel veurig jaor was.
Jobje de Post was heelemaol goed te spreeke. 't Was bar makkeluk dat'ie de bult bij de Koepel niet op hoefde klimme. De minse die in 't daarp liepe kon d'ie geliek de post meegeeve! Hij is nog nooit zoo op tied klaor geweest mit z'n kerstkaorte as dit jaor.
Ja, d'er zin weer een hoop vrijwilligers op de been geweest um al die tente en kraome op te zette. Ik heurde dat Henk Houtluus 's maarges al um zes uur in 't daarp was. Ze hen 't weer mooi klaorgespeuld mit z'n alle.
's Aoves opruume ging ok van een leije dakje! Héél veul minse kwaome spontaon helpe, echt op z'n Lunters, de schouwers d'r effe onder en dan is 't zoo gebeurd. Mer toen Evert Veen de slaoger d'er mit de warme hap ankwam was alles op 't nieuwe Aarf al ofgebrooke!
Gien punt zei Anton Floor, jie neemt 't eete mee en ik het nog drinke zat thuus. En zoo hen ze gezelleg bij Floor gezeete.
Ik bin dit jaor niet op de kerstmart geweest. Nee, ik kon thuus niet vurt. Dina en ik waore nét die dag veerteg jaor getrouwd. De heele dag deur hen we anloop gehad, tillefoontjes en een baarg kaorte! Hastikke bedankt allemaol!Iezeg gezellig. 's Aoves nog een hoop vollek in de schuur. Dus dan begriep je wel, dan kun je niet vurtloope! Mer bij gezondheid hoope we volgend jaor wel weer van de partij te zin.
Ik hoop dat jullie allemaol heele fijne kerstdaoge hen gehad en een goeie jaorwisseling. De feestdaoge zitte d'er al weer op.
Daarpsgenoote, een nieuw jaor ligt veur ons en ik wens dan ook iedereen een goed en veural gezond 2009 toe.
De Lookoo van Lunteren
(Jaap v.d. Heuvel)
|
|
09-01-2009 |
|
|
|
|
|
|
|
|
