Van de week zat ik zo ' in mien eige te prakkezeere en ineens bedenk ik me dat ’t van ’t jaor wel een heel biezonder jaor is. We hen zogezeid dit jaor heel wat te viere in ons daarpje. Lees mer ' mit mien mee.

In februari was ’t veertig jaor geleeje dat de tennisclub wier opgericht. In ’t nieuwe clubhuus, kantiene mag je nie zegge, hen ze dat as vereeneging saome gevierd. ’t Is da’k zelf nie an tennis doe, mien stramme botte bin daor nie meer veur geschikt, mer aanders wa’k zeeker effie angegaon.

Verleeje maond besting de EHBO dertig jaor. Kiek, da' noe ' een club mit 'n lange aojum. Da' dan ok gien wonder went alle week motte ze op zo’n pop oefene mit reaniemeere. Vrogger he’k ok nog ’t EHBO-diploma gehaold, mer daor hoef ik noe nie meer mee an te komme. In mien tied stelde dat nog nie zo heel veul veur. Ik het wel ' geheurd dat je vandaog an de dag haost zo knap as een dokter mot weeze veur je ’t diploma krieg. Nee minse, d’r komt heel wat bij kieke, zo’n EHBO. En dan te bedenke dat die EHBO-ers dat allemaol doen um een aander te kunne helpe. Ik neem d’r de pet veur of!

In april bestaot dan ok nog de volleybalvereeneging veertig jaor. Ofgeloope zaoterdag wier dat veur ’t heele daarp gevierd in de nieuwe sporthal. Veur de jeugd was ’t er ’t een en aander georganiseerd en de beste volleyballers uit ons land speulde an’t end van de middag een demonstaotiewedstrijd. Nao ofloop was ’t ok iezeg gezelleg he’k wel geheurd.

Dat waore noe al drie jubileerende vereeneginge uut ons daarp. Mer we zin d’r nog nie, went in mei bestaot Lunthari vijfentwientig jaor. En dat mot netuurluk ok gevierd wurde. Ze zin van plan um bij Floor een groot feest te gaon geeve. As alle minse die daor naor toe gaon noe ok ’t ouwe pak an trekke dan kan ’t nie meer stuk. De deeres van Lunthari zulle ’t vast en zeeker op prijs stelle as de heele zaol d’r mee vol zit. Dan liekt ’t net een groote boerebrulloft.

Mer weet je noe wat ik ’t allermooist viend van al die jubileerende vereeneginge. Ze hen dat stuk veur stuk alleeneg bereikt deur de inzet van al die vrijwilligers die d’r deur de jaore heen veul vrije tied gestooke hen. Minse, zonder hen kan gien eene vereeneging ’t redde. Ik hoop dat we zo nog veul jubileums magge viere. Daorum: iedereen van harte gefielleceteerd!!!

Minse, tot zoveer…

Ep Spek