|
|
|
|
Wat gaot te tied toch iezeg vlug
|
.We hen Oud en Nieuw net achter de rug en noe is ‘t alweer zoowat februari. Ik hoop dat jullie allemaol een goeie jaorwisseling hen gehad, net as ik.
Mer noe las ik dat de Lunterse Kraant ok al weer tien jaor bestaot. ‘t Liekt nog as de dag van gistere dat’ie veur ‘t eerst uutkwam. Wijlen Herman Klomp en Wiebe Spelt van de onderneemers Societeit Lunteren hen ‘t veurtouw genoome. Henk de Rooij het ‘t veerder uutgebouwd en mit veul sukses. De kraant komt teegeswoordegs in alle plaotse die boove de Rijksweg 224 ligge. Zelfs in Kernhem. Veural op het Lunterse plattelaand wordt’ie deur en deur geleeze. Zeeker umdat daor niet altied aandere kraante bezorgt worde.
As een kraantejong perongeluk een adres wat veer van de weg ofligt het vergeete, dan is dat gien ramp. Bij de bezinepomp en de Lunterse supermarkten liggen ze vanof vrijdagsoaves ok. Dus je hoeft’em niet te misse! Ik weet dat ‘t bij heel veel lunterse huushouwes net is as bij mien thuus: we kieke alle week weer naor de Lunterse Kraant uut, hij is niet meer weg te denke. Je kunt ‘t geleuve of niet mer ze leeze em zelfs in Amerika. En as t’ie een keer te laot op de post gaot dan komt’er een mail van: “waor blieft de kraant!!” Ja Henk, in ‘t veere Amerika kennen ze joe ok, ik het daor an een paor minse uutegeleid van wie of jie d’er één bin. Van Kees van Henk de Rooij, ik het ze persoonluk goed gekend, ok de zuster van je vaoder, Dien.
De Lookoo van Lunteren Jaap v.d. Heuvel
Henk jong, een héél groot komplement veur alles wat jie in die tien jaor veur de Lunterse Kraant het gedaon en zoo we hoope nog veule jaore wilt doen.
Ik zou je greg een dikke veer op je leere hoed steeke mer ik bin bang dat ik dat niet veurmekaor krieg, jie bin zoo zuunig op! Ja, we zien Henk geduureg in ‘t daarp loope of fietse. Hij het teegeswoordegs een postcode-looterij fiets mit een sticker van de Lunterse Kraant d’er op. En zoo kom je em dan teege as t’ie de advertenties op gaot haole. Netuurlek herkenbaor an z’n hoed, zoogezeid: Henk hoed. De kraant is alles veur Henk, soms zie je ‘s aoves laot de lamp nog braande op z’n kantoor, dan is Henk nog druk an’t waark um de kraant op tied de deur uut te kriege. Ja hij is ok iezeg druk met de korfbalvereeniging. Daor doet’ie iezeg veul veur en zoo gebeurd ‘t nog wel es dat’ie ‘s aoves laot de kraant nog of mot maoke. Dat viend t’ie gien probleem, ‘t komt altied op tied of. Ja, wij viende ‘t heel gewoon dat de Lunterse Kraant bij ons op de mat valt mer véurdat’ie valt ist’er al een hoop waark verzet! En we motte niet vergeete Henk staot’er alleen veur. Hier een foto maoke, daor een advertentie ophaole, weer bij een aander intervieuwe ofneeme en gao zoo mer deur. Nogmaols Henk, harteluk dank veur ‘t veule waark wat je de ofgeloope tien jaor veur ons gedaon het. Gao zoo deur! Op naor de volgende tien jaor.
De Lookoo van Lunteren
Jaap v.d. Heuvel |
|
26-01-2010 |
|
|
|
|
|
|
|
|
