Nieuws
’t Vrijdagmaarge darteg augustus, rondje ouwe voertuuge Oud Lunterse Dag
Op de vrijdagmaarge houwe we weer een rondrit mit ouwe voertuuge. ’t Was veureg jaor mit ’t jubileum ok een iezeg succes. Pieter Kool van de 16 km club reegelde veureg jaor alle voertuuge en die had z’n haande vol an zoo’n groote opkomst! Dus we hen besloote da’we de ritte ampart gaon houwe. D’r is een rondje veur ouwe trekkers en aander rijdbaor spul. We hen een rondje veur ouwe autoos en motore en d’r wordt een rondje speesjaol veur brommers uutgezet. Zoo bin de snelheeje een bietje op elkaor ofgestemd. Tis de bedoeling da’we mit z’n alle ankomme in ’t daarp zo rond een uurtje of één in de middag.
Umdat d’r toch wel wat veur gereegeld mot worde, wille we greg dat iedereen zich inschrieft. Je mag je eige alleen inschrieve, mer ok as groep. Geef dan wel effe alle kentekes en mit hoeveul minse deur. Degene die inschrieve kriege een startbewies, wat gaot gelde as andenke an ’t rondje. Dit wille we jaorluks laote terugkomme. Inschrieve kan mit een meel naor: Trekkers, auto’s en aander rijdbaor spul: pieter.kool@16kmclub.nl Brommers: brommerritoudluntersedag@gmail.com
De trekkers en aander rijdbaor spul zulle vrijdag ’s maarges umstreeks half 11 verzaomele an de bosloan. De auto’s verzaomele an de Van den Hamlaon en um elf uur rije we mit ’t hele spul vurt. Verzaomele van de brommers doen we bij Floor vanof half tien ’s maarges. En kwart veur elf snuuve we ok daor de weg op. Dit jaor is ’t thema ’’Mit veul franje kleurt ons daarp oranje’’. We zien natuurluk greg dat jullie hier iets mee doen!
De Kemissie Oud Lunterse Dag