Nieuws
Van de week trof ons ’t droevege bericht dat ’t Eerelid van de Oud Lunterse Dag, Jaap van den Heuvel, op 77-jaorege leeftied, is ooverleeje. Jaap was al geruume tied ziek, mer toch altied bij de oopening van de Oud Luntere Dag anweezeg. Dat geeft al an hoe hij nog altied betrokke is gebleeve bij de Oud Lunterse Dag.
Jaap was een mins uut duuzende en is één van de persoone die de Oud Lunterse Dag groot hen gemaokt. Jaap is vanof 1985 een heele poos veilingmeester en ofslaoger geweest. Dat dee die mit z’n maot Gijsje Heiwegen. Mit hum speulde Jaap ok de komische persoonaoges ‘Gijsje Peut en Gaartje Knip’. De meeste minse zulle Jaap kenne van ’t praotiezer, waormee die de Reutemeteut an mekaor wauwelde. Veerder is Jaap in 1992 Booveste Beste Burger geweest en ok nog geruume tied Lookoo van ons daarp. Veur Jaap was de Oud Lunterse Dag z’n lust en z’n leeve!
We zulle ‘m nooit vergeete en de herinneringen an ‘m zulle altied blieve bestaon. We leeve mit Dien, kiendere en kleinkiendere mee en wense ze de ankommende tied veul kracht en staarkte toe.
 
De Kemissie Oud Lunterse Dag, De Lunterse Keie, Bungels en
alle oud-leeje van de Stichting Oud Lunterse Dag